LUKA LAM HATE

Karya : Sabri Grong Grong

Reudok di gunoeng, ujuen pih jitroen.
Udalam gampong, ie raya jile.
Wate loen ingat, ie mata jitroen.
Peudeh lam jantong, luka lam hate.

Bungong iemawoe, timoeh lam keuboen.
Oh ujeun jitroen, patah bak tangke.
Loen pike gata, dara boh lam oen.
Wate akhe thoen, keu ubat hate.

Hana loen sangka, gata hai kuntom.
Hana le harom, lage loen pike.
Loen sangka madu, gata bi keuloen.
Rupa jih racoen, taboeh lam cupe.

Rugoe meulumpah, gata loen sanjoeng.
Meubuleun meuthoen, loen ingat sabe.
Mnyoe loen tupue, lge nyoe ujoeng.
Pasti awai phoen, han loen jok hate.

Yang loen harapkan, tanle bak kuntom.
Boh mamplam teupoeng, kaleumiek tangke.
Loen harap apam, simpan lam bangkong.
Kuweh yang sirong, awai gob cungke.

Keupue lom guna, cinta tasamboeng.
Meunyoe boh punggong, gata ka jile.
Boh putek madu, kahu bak ujong.
Kalheuh gob u goen, meunyan ploek gambe.

Wate loen pike, hate that rihon.
Bungoeng loen sanjong, harom tan le bhe.
Kasep ngoen bukti, gamba teu lhoen-lhoen.
Seucara langsong, Loen eu lam HP.

Siploh on foto, yang ka jilambong.
Le sidroe kawom, bak loen jibi the.
Maka loen tupue, buet jih di gampoeng.
Inoeng loen sanjong, peurawan tan le.

Gamba yang asli, han jeut loen peutroen.
Foto yang langsong, teugoeh ji ruge.
Kutakoet jikheun, kureung aja loen.
Walau jih ngoen loen, jinoe hana le.

Cukop na parah, nasib di uloen.
Alah kakeuh hoem, han ek loen pike.
Mungken na hikmah, geubi le rabboen.
Singoeh keu uloen, inoeng goet hate.

    .....Salam,,sejahtra.....

Disunting oleh : Zulfahmi Mustafa

"HANA TROEH MAKSUD"

Karya : Ilham Sûnjaýÿ

Kalheuh bg pugah, bak kah hai DEK CUT.
Badan lon PIJUET,  peureuseh hi toi.
Lheuh nyan tan carong, kon ureung JAK BEUT.
Bak lon hana jeut, jak peuglah KA-OI.

Maka di gata, mata bek TEUNGEUT.
Baci keuh TABLEUT,beu beutoi-butoi.
Keupue ta CINTA, hana troh MAKSUD.
Lon takot teusuet,karang boh LANGGOI.

Koen chit lon TULAK, tabak lam paleut.
Bukoen han kujuet, bak pajoh DODOI.
Tapi adek eo, BAHO han santeut.
Sit hanjeut keubuet, lon kap KUWEH BHOI.

Ho laen karheng, kaweng pusu BLEUT.
Beutimang bak pruet, wate ka cangkoi.
AGAM yang kaya, na HONDA DARUET.
Harta troh JAKEUT, kalheuh ji kumpoi.

Miseu bang ILHAM, agam itam kleut.
Cukop jai TUMUET, alah adek oi.
Kadang KEURIJA,  paya kujak seut.
Yang na rutin BUET, ku meukat CINDOI.

Diposkan oleh : Zulfahmi Mustafa

HANA SIBANDENG

Pengarang : Ir Hendra Underline
==================

indah hana ban anoe di pante...
mawoe dalam gle haroem bei sukma...
indah koen wayang bintang meu ble ble...
hu beuleun sare peuneurang donya...
=================
adoe lon sayang peuneurang hate...
gaseh han lon cre yang ka tabina...
walau meu labang cinta lam hate...
namun han sampe ta hudep sama...
===================
karna penghalang meulintang sabe...
pageu meu rante meu ikat baja...
hanjeut lon lingkeu lam pageu toge...
seubab han sabe pangkat ngoen harta..
================
bakat di laot disuroet sabe...
maju sigoe ble but angen yang ba...
namun di gisa dibineh pante...
seubabab han sampe di le uluwa..
=================
meunan tamselan intan bohate...
ulon han sampe meunyoe ngoen gata...
hantroeh lon cugoet mawoe dalam gle...
bak cabeung sare duroe meubisa...
==================
han mungken saban jeundrang lam pade...
han mungken sare dile ie raya...
han mungken sayang cinta lon uke...
han mungken sampe gata lon puja...
==================
meubek na intan gata weuh hate...
meubek teu pike lon tan setia...
meubek teubayang meu ube pade..
meubek bohate ta benci rupa...
================
gata lon tinggai teupaksa hate...
gaseh lon peu cre siksa lam dada...
kareuna ayah gata bohate...
keu lon peusampe peu jueoh gata...
===================
rasa han sanggoeb lon tob keunande...
asoe meu hase meureutoeh juta...
hanpat lon mita permata hate...
pawoen meu tangke bermutiara...
================
lon lake meuah baten ngoen lahe...
nibak bohate yang ulon cinta...
walaupun gaseh hana meu sampe...
namun lam hate mantoeng adinda...
=================

Diposkan oleh : Zulfahmi Mustafa

MADU MEURACON

Karangan : Ir Hendra Underline

........................
indah koen wayang, buleun limoeng blah...
sibintang peut blah, mirah that warna...
gata loen sayang, adoe meutuwah...
gaseh lon papah, cinta loen seuma...
.........................
loen harap gata, hai bungoeng ceudah...
keumang si ulah, mirah meu warna...
bek sampe luroeh, putoeh peuneurah...
bek sampe reubah, beukah bei sukma...
..................
sabe loen siram, uram loen papah...
sabe loen keubah, pupoek loen seuma...
supaya keumang, bungoeng si ulah...
supaya ceurah, mirah meu warna....
........ .................
loen harap gaseh, puteh neu balah...
cinta neu seurah, ikhlah lam dada...
koen cuma janji, neubi bak babah...
koen cuma sumpah, ilah setia....
...... .................
meunyan keuh syarat, yang uloen peusah...
nyan yang loen peugah, bak gata dinda...
gata teurimoeng, ngoen hate ikhlas...
sigra ta peugah, ta peusah cinta...
.....................
janji nibak loen, gata ta peusah...
tanyoe han pisah, siumu masa...
walaupun hudep, geutanyoe susah...
cinta han ubah, sampe an tuha....
........................
hana taharap, harta meulimpah...
rumoeh yang meugah, hana tahawa...
peunteng setia, bak loen ta peugah...
meunan lah sumpah, gata adinda...
......................
teutapi jinoe, janji meu ubah...
sumpah teuh beukah, han meuhoe punca...
gata adinda, ka tagrak langkah...
uloen takeubah, lam hate luka...
......................
loen sangka madu, keu loen ta keubah...
rupanya jeulah, racoen meubisa...
uloen tadusta, adoe meutuwah...
keu loen taruwah, seuneurah nira....
....................
madu meuracoen, keu loen ta keubah...
janji ngoen sumpah, ka leupah taba...
meupat loen mita, ubat peuneurah...
peu ubat darah, hate yang luka...
......................
bah le loen sidroe, adoe meutuwah...
ngoen dada beukah, loen irah cinta...
moga di gata, adoe meutuwah...
bahgia leumpah, ngoen judoe gata....

Diposkan oleh : Zulfahmi Mustafa

APUI HANA HU

Oleh : Faxriel Faiz Azkalz

Asap meubura, peuja koen wayang
Han pue taseumbam, jaroe ngoen beuteh
Beu that tan deuh nge', hu jieh hana trang
Kulet teuh leukang, meu caboek puteh

Meunan umpama, haba loen layang
Pikee keuh rakan, asoe lam rinteh
Koen keuh loen takse, meu rawe karang
Beuk ciet hy abang, neu pikee paleh

Judul yang loen me, rite meugawang
Ibarat panggang, bak sagoe binteh
Bak pikee tan nyuem, meu gaseh sayang
Haroek han leukang, dak si bantai eh

Apui lam seukeum, meunyuem ban arang
Bak sang hi panggang, han masak abeh
Keubiet tasapeh, ta anggap rakan
Ge tatiek bubrang, lam raga bileh

Ta e tan daya, nyata meugawang
Asap meukuyan, ban tatoet tapeh
Ho ho yang tajak, mata han goet trang
Meu saloep awan, meu gafhan puteh

Ta harap rakan, meu saboeh badan
Ta sapeh sayang, deugoen ta gaseh
Ujoeng deuh nyata, cela jihidang
Akai ban musang, meu kurek binteh

Dak goet tasatoeh, angoeh hi badan
Bak sang ciet kalang, han abeh abeh
Dak goet ta gaseh, tasapeh beuk krang
Teutap ciet rakan, ujoeng jieh jayeh

APUI HANA HU, kiban ta siram
Meu sa'p sa'p badan, dak ie dam abeh
Beu that tapikee, nge' jieh tan simbhan
Pu yang na sajan, manduem euk jikreh

Beuk salah pikee, ta takse rakan
Takoet jeut mumang, nyoe biet tasapeh
Beuk salah tawoek, neu roek taneuk tran
Takoet jeut leukang, labang bak binteh

Beuk salah tacok, ta harok rakan
Beugoet ji sayang, sifet han paleh
Beuk salah pileh, buweh geulombang
Teurhoek troeh datang, rukueng teuh peudeh

O'h no meumada, rika loen layang
Wab jula malam, mata ka peudeh
Meupat na salah, payah bak neu pham
Leubeuh goet hy bang, laju neu peugleh

Ujoeng bak karang, saleum neu reugam
Neu samboet rijang, beuk sampoe jayeh
Meubiet han neu tueng, lam tong neu kuran
Meuhan lam pisang, keudeuh neu aleh

Diposkan oleh : Zulfahmi Mustafa